Mühərrik təmiri və mühərrik ustası

Mühərriklə bağlı şikayətlərin çoxunda səbəb sökmədən aşkar olunur. Kompüter diaqnostikası xəta kodlarını və mühərrik beyninin gördüyü canlı məlumatları göstərir: hava sərfi, yanacaq korreksiyası, alışma bucağı, hər silindrdə alışmanın buraxılması (propusk). Kompressiyanı ölçəndə porşen halqalarının və klapanların vəziyyətini görürük. Silindr balansı testi isə problemin hansı silindrdə olduğunu dəqiqləşdirir.

Bu ardıcıllığı təsadüfən seçməmişik. Titrəmə və güc itkisinin səbəbi alışma sistemi, farsunka, turbo, hava sızması ola bilər, ya da doğrudan da mühərrikin içində. Əvvəl ucuz səbəbləri yoxlayırıq ki, xırda nasazlığa görə böyük təmirə pul verməyəsiniz.

Mühərrik qızanda ən çox zərər görən hissə qalovkadır. Soyutma sistemi xarab olub mühərrik qaynayanda qalovka əyilir, prokladka (araqatı) yanır, antifriz yağa və ya silindrə qarışır. Bunu belə tanımaq olar: genişləndirici bakda qabarcıqlar çıxır, yağ qapağının altında qəhvəyi köpük yığılır, egzozdan davamlı ağ tüstü gəlir, antifriz səbəbsiz azalır.

Qalovkanı söküb təmizləyirik, düzlüyünü yoxlayırıq, lazım olanda emala göndəririk. Klapanlara, klapan salniklərinə və oturacaqlarına baxırıq, prokladkanı və boltları yenisi ilə dəyişirik. Təmirdən sonra soyutma sistemini də yoxlayırıq, çünki qalovkanı yandıran səbəb yerində qalsa, hər şey təkrarlanacaq. Avtomobil radiator təmiri və soyutma sistemi işləri də bizdədir.

Dizeldə güc itkisi və qara tüstü çox vaxt mühərrikin özündən yox, yanacaq və hava sistemindən gəlir. Səbəb farsunkalarda, yüksək təzyiq nasosunda, turboda, EGR-də və ya hava sızmasında ola bilər. Ona görə dizel mühərrikini başqa ardıcıllıqla yoxlayırıq: geri axını (obratkanı) ölçürük, təzyiq göstəricilərinə və turbonun aktuatorunun işinə ayrıca baxırıq.

Bu hissələrin hamısı AzonAuto-da bir yerdədir. Farsunka təmiri stenddə yoxlama ilə, yanacaq nasosu təmiri nasosun testi ilə başlayır, turbo təmirini də burada edirik. Beləliklə üç ayrı ustaya getmək lazım olmur, ustalar da problemi bir-birinin üstünə atmır.

Mühərriki çöldən iki məqsədlə yuyuruq: yağ və antifriz sızmasını görmək və təmirdən əvvəl üstünü təmizləmək. Çirk basmış mühərrikdə təzə sızmanı köhnəsindən ayırmaq olmur. Ona görə sızma axtarışı çox vaxt yumaqdan başlayır.

Yuyanda elektrik qoşqularının, generatorun, beynin və datçiklərin üstünü örtürük. İş sadə görünür, amma səhv edilsə, bahalı elektrik nasazlığına səbəb olur. Avto elektrik ustası və beyin təmiri də bizdə olduğu üçün buna xüsusi fikir veririk.

Mühərrikin «xarab olması» həmişə mexaniki problem demək deyil. Kolenval və ya raspredval datçiki, hava sərfi datçiki (MAF), detonasiya datçiki xarab olanda, provodkada qırıq olanda və ya mühərrik beyni (ECU) sıradan çıxanda da əlamətlər eyni olur: maşın işə düşmür, titrəyir, güc itirir.

Mühərrik beyninin təmirini bizdə Orxan usta platada, detal səviyyəsində edir. Başqa yerdə «beyin ölüb, yenisini al» dedikləri hallar çox vaxt təmir olunan nasazlıqdır. Ona görə mexaniki təmirə başlamazdan əvvəl elektronikanı yoxlayırıq.