Karobka beyni (TCM) təmiri və proqramlaşdırılması

Avtomat və robot karobkanı ayrıca bir modul idarə edir. Bu, TCM-dir (Transmission Control Module), xalq arasında ona karobka beyni deyirlər. Modul sürət sensorlarından gələn məlumatı oxuyur, solenoidləri idarə edir və sürətin nə vaxt, hansı təzyiqlə keçəcəyini müəyyən edir. Bəzi maşınlarda o, karobkanın içində, hidroblokun üstündə olur, bəzilərində isə salonda və ya mühərrik bölməsində ayrıca yerləşir.

Modul sıradan çıxanda əlamətlər mexaniki nasazlıqla eyni olur: avariya rejimi, itən sürətlər, təkan. Fərq ondadır ki, bu halda karobkanın içində hər şey sağlam ola bilər. Ən çox bu səbəblərə rast gəlirik: solenoid drayver tranzistorlarının yanması, lehim çatları, su və yağ dəyməsindən korroziya, gərginlik sıçrayışı. Bunların hamısını lövhə səviyyəsində təmir edirik.

Orxan usta modulu açır, lövhəni mikroskop altında yoxlayır və nasaz komponenti tapıb dəyişir. Su dəymiş lövhəni ultrasəs vannasında təmizləyir, korroziyaya uğramış cığırları bərpa edir. Üsullar beyin təmiri səhifəsində yazdıqlarımızın eynisidir, nasazlıqlar da oxşardır: yanmış drayver, oksidləşmiş cığır, çatlamış lehim, şişmiş kondensator.

Təmirin üstünlüyü təkcə qiymətdə deyil. Təmir olunan modul öz proqramı və öz kodlaşdırması ilə qalır, ona görə yeni modul alanda yaranan uyğunlaşdırma və immobilayzer problemləri olmur. Su dəymiş modulu isə gecikdirməyin. Korroziya günlərlə yayılır və xilas etmək mümkün olan lövhəni məhv edir.

Volkswagen, Audi, Skoda (DSG), Hyundai və Kia (DCT), Ford (PowerShift), həmçinin Changan, Geely və Haval kimi markalarda karobkanı mexatronik bloku idarə edir. Blokun iki hissəsi var: hidravlik hissə və elektron lövhə. Biz elektron lövhəni təmir edirik və bu, blokun tam dəyişdirilməsindən ucuz başa gəlir.

Diaqnostika problemin elektron lövhədə, yoxsa hidravlik hissədə olduğunu göstərir. Problem mexaniki tərəfdədirsə, vaxt itirməyəsiniz deyə bunu dərhal deyirik.

Karobka beyni fiziki cəhətdən sağlam olsa da, proqramı pozula bilər. Belə olanda modulun proqramını yenidən yazırıq. Yeni və ya işlənmiş TCM quraşdırılanda isə onu avtomobilin VIN-i və digər modulları ilə uyğunlaşdırmaq lazımdır, yoxsa karobka düzgün işləməyəcək.

Adaptasiya ayrıca vacib mərhələdir. Debriyaj paketi və ya karobka dəyişiləndən sonra adaptasiya edilməsə, karobka yeni hissə ilə də köhnəsi kimi işləyir. Başqa servisdə mexaniki təmir olunmuş karobkalarda da adaptasiya aparırıq.

Boş yerə gəlməyəsiniz deyə bunu ayrıca yazırıq. Karobkanı sökmürük və yığmırıq. Friksion disklər, hidroblokun mexaniki təmiri, hidrotransformator (bublik), debriyaj komplekti, şaftlar, ŞRUS və diferensial işləri də AzonAuto-da görülmür.

Bizim işimiz elektronikadır: karobka beyni, mexatronikin lövhəsi, sensorlar, naqil dəstəsi, proqram və adaptasiya. Bir də karobka yağını dəyişirik. Diaqnostikadan sonra problemin hansı tərəfdə olduğu bəlli olur və mexaniki nasazlıq çıxsa, bunu sizdən gizlətmirik.